आठवण
तुझी असण्यापेक्षा
नसण्याची सवय जास्त
मी रिकामीच रे
तू मात्र कामात व्यस्त
खूप काही मनात साचून राहलेल
तुझ्या येण्या कडे लक्ष लागलेल
येशील तेव्हा मनसोक्त बोलु
सुखदुःखाचे कवाड खोलू
गप्पा च्या ओघात
भान वेळेचे विसरू
प्रितीच्या अस्मानी
सुखावेल सैरभैर पाखरू
शब्दांनीच ओंजळ
एकमेकांची भरू ...
तृप्त होऊ मिठीत
दुःख विरहाचे विसरू...
रांगोळी
रांगोळी ही पुसली जाणार आहे, हे माहित असून देखील आपण ती मन लावून, जीव ओतून, तासभर अतिशय सुबक, सुंदर आणि रेखीव काढण्याचा प्रयत्न करतो...
तसंच आपलं आयुष्य हे, कधीतरी संपणार आहे...
ते अधिक सुंदर बनवून जगण्याचा प्रयत्न करुयात !
✍️वसुधा इंगळे
स्त्री व पुरुष
पुरुष एकापेक्षा अधिक स्त्रीयांवर प्रेम करतो किंवा करु शकतो. कारण, त्याच्या प्रेमाचा क्रायटेरिया हा बेसिकली शरीरापासून सुरु होऊन टप्प्याटप्प्याने मनाकडे जातो....हा प्रवास मोठा आहे.
या प्रवासात अधेमधे त्या स्त्रीपेक्षा अधिक आकर्षक असं शरीर असणारी स्त्री त्याला पुन्हा Back to square one आणू शकते. मग पुन्हा नवं शरीर, त्या नव्या शरीराचे नवे गंध, नवे डावपेच, समागमाचे नवे आडाखे यात तो परत अडकतो आणि अलगदपणे प्रेमापासून लैंगिकतेकडे ओढला जातो. तो नैसर्गिकरीत्या स्खलनशील असल्याने नेहमीच अनैतिक, अश्लील आणि नितीभ्रष्ट म्हणून ओळखला जातो....
स्त्रीचं सॉफ्टवेअर नेमकं उलट आहे. तिचा प्रवास हा मनाकडून सुरु होतो आणि शरीराकडे जातो. जो लहानसा आहे. त्यातच तिला सिक्स् सेन्स असल्याने स्त्री अगदीच बिनडोक असेल तरच पुरुषी ढोंगीपणाला बळी पडते...तिला देखण्या शरीरयष्टीचा मोह क्षणिक होतो, जे नैसर्गिक आहे. पण मैत्री आणि वैवाहिक जोडीदार निवडण्याचे तिचे निकष हे अगम्य आणि Unpredictable असतात. काळानुसार बदलतातही. म्हणून तिच्या आयुष्यात खंडीभर पुरुष कधीच नसतात. फारफारतर दोन किंवा अगदीच तीन म्हणजे डोक्यावरुन पाणी. तिचे निर्णय चुकल्यावर ती नवा पुरुष शोधायच्या भानगडीतच पडत नाही हा तिचा अफाट USP आहे. ती झटक्यात Move On होऊन स्वतःची एनर्जी वाचवते. दुसरा पुरुष आयुष्यात येताना त्याची असंख्य अग्निदिव्ये ती घेते. तिला जिंकणं म्हणजे तिचं मन जिंकून घेणं सोपं नसतं....
लक्षात घ्या, एखादी स्त्री जर तुमच्यावर प्रेम करत असेल तर तिच्या प्रेमाचा आदर करा. पुरुषी अहंकार चुलीत घाला. तिची मते विचारात घ्या. आणि तिला धोका देऊ नका. जेनेटिकली तुम्ही नैसर्गिकरीत्या खुले सांड असाल तरीही नाजूक पारिजातकाच्या झाडाला बांधलेले आहात हे विसरु नका. एका झटक्यात दावण तोडून निघू शकता, पण आयुष्यभर उन्हात वणवण फिरण्याची तयारी असू द्या म्हणजे झालं...
✍️सचिन मधुकर परांजपे.
मै हूं ना
आयुष्याच्या या धावपडीत तुमच्या सुखात, यशात पुढे पुढे करणारे खूप असतात. मोठे मोठे आश्वासने देऊन योग्य वेळेवर निसटून जाणे हे आजकालचं फॅशन आहे. योग्य वेळेवर आपली साथ देणारे हे मात्र मोजकेच.
आपल्या दुःखात हक्काने कोणत्याही परिस्थितीत आपल्या सोबत खांद्याला खांदा लावून 'मै हूं ना' म्हणत आपल्याला धीर देणारे हे फार कमी असतात. आणि आज खऱ्या अर्थाने अशी माणसे जोडणं फार महत्त्वाचं आहे. जी सुखा सोबतच तुमच्या दुःखात सुद्धा प्रामुख्याने सहभागी असतील.
✍️ वसुधा इंगळे
अवघं विश्व सुंदर भासतं...!!!
बऱ्याच स्त्रियांना शारिरीक सौंदर्याचा न्युनगंड असतो,मी समाजात वावरत असतांना माझ्या निरीक्षणात येतो...
पण, खर सांगू मैत्रिणींनो...पुरूषांना कांय आवडेल, याचा विचार करून स्वतःला घडवू नका...
पुरूषी नजरेतून स्वतःचं सौंदर्य तोलणं, म्हणजे स्वतः मधील स्त्रीत्वाला कमीपणा देणं आहे...
सकाळी उठून सडा-टाकून झाल्यावर स्वतःच्या हातानं काढलेली रेखीव रांगोळी पाहिलीत, तर तुम्हाला तुमच्या बोटातली सुंदरता दिसेल...
स्वच्छ- सुंदर आवरलेलं, स्वच्छ स्वयंपाकघर तुम्हाला तुमच्या गृहिणीपणाचं सौंदर्य सांगेल...!
तुम्ही शिक्षिका असाल, तर तुमचं सौंदर्य फळ्यावर नीटपणे लिहिलेल्या अक्षरात असेल. विषयाचं आकलन झाल्यावर दिसणारे विद्यार्थ्यांचे आनंदी चेहरे, ही तुमचीच सुंदरता आहे...
सौंदर्य कपड्यात नाही, कामात आहे....
सौंदर्य नटण्यात नाही, विचारांमधे आहे...
सौंदर्य भपक्यात नाही, साधेपणांत आहे...
सौंदर्य बाहेर कशात नाही, तर मनांत आहे...!!
आपण करत असलेलं प्रत्येक काम म्हणजे सौंदर्याचंच
सादरीकरण असतं...!!
आपल्याला आपल्या कृतीतून सौंदर्याची निर्मिती करता आली
पाहीजे...
प्रेमानं बोलणं म्हणजे सुंदरता...!!
आपलं मत योग्य रीतीनं व्यक्त करता येणं म्हणजे सुंदरता...!!
नको असलेल्या गोष्टीला ठाम नकार देण्याची हिंमत म्हणजे सुंदरता...!!
दुसर्याला समजावून घेणं म्हणजे सुंदरता...!!
आपल्या वर्तनातून, विचारातून आपलं सौंदर्य बाहेर आलं पाहिजे.
हाती आलेला प्रत्येक क्षण रसरशीतपणे जगण्यांत
खरी सुंदरता आहे...!!
आपण करीत असलेल्या कामात कौशल्य प्राप्त झालं,
की आपोआपच आत्मविश्वास वाढतो, आत्मसन्मानाची
जाणीव होते...
अशी आत्मविश्वासानं जगणारी स्त्री आपोआप
सुंदर होते, हा माझा स्वानुभव आहे...
इंदिरा गांधींचं सौंदर्य कणखर निर्णयक्षमतेत होतं,...
मेरी कोमचं सौंदर्य तिच्या ठोशात आहे...
बहिणाबाईंचं सौदर्य त्यांच्या असामान्य प्रतिभेत होतं...
लतादीदींचं सौंदर्य त्यांच्या अप्रतिम, दैवी आवाजात आहे...
वेळ प्रसंगी या सर्वजणींची आठवणच आपलं जगणं
सुंदर करायला मदत करेल...
आपण जशा जन्माला आलो आहोत, तशा सुंदरच आहोत,
ही खूणगाठ मनाशी बांधून टाकली, की सौंदर्याकरीता
दुसर्या कुणाच्या पावतीची गरज पडत नाही आणि
अवघं विश्व सुंदर भासतं...!!!
✍️ वसुधा इंगळे
